EHUprest: Digital Management & ERP: Enpresaren kudeaketa 4.0

Eraldaketa digitalak ekarri duen iraultzak gizarteari, ekonomiari eta erakundeen kudeaketari eragiten die, eta negozio eredu guztiz berritzaileak sortzen ari dira: gauzen Interneta (IoT), ekoizpen gehigarria eta inteligentea, fabrikazio pertsonalizatua, sarean enkriptatzeko sistemak, enpresa baliabideak planifikatzeko tresnak (ERP) edo enpresen posizionamendu digitala.

Negozioen arloan aldaketa hori kudeatzeko gai diren profesionalen eskaera areagotzen ari da, eta masterrak behar horri erantzuten dio, zeharkako ikuspuntu tekniko eta malgu batetik.

Master honetan, enpresaren kudeaketaren hainbat arlotan parte hartzeko beharrezkoak diren gaitasunak garatuko dituzu, eta, horrez gain, ingurune digitaletan informazioa egoki kudeatzen ikasiko duzu; ingurune digital horretan bertan negozio joera eta eredu berriak identifikatuko dituzu; eta, sarean eta ingurune digitaletan banatutako lan taldeak lideratzeko, zuzentzeko eta koordinatzeko gaitasuna lortuko duzu.

Irteera profesionalak

Haren zabalera, zeharkakotasuna eta malgutasuna direla eta, master honek irteera ugari eskaintzen ditu era askotako enpresetan: ERP kudeatzaileak; 4.0 ezartzeko eta digitalizatzeko proiektuetako kudeatzaileak; salmenten administrazio teknikaria; arduradun administratiboak; kanpo aholkulariak, sustatzaileak edo ekintzaileak; oinarri teknologikoko enpresa berrietako profesionalak; etab.

Egitura modularra

Ikasleen profil desberdinei eta haien denbora erabilgarritasunari egokitzeko asmoz, “Digital Management & ERP: Enpresaren Kudeaketa 4.0” Berezko Masterrak , 3 Unibertsitate Titulaziotara sarbidea eskaintzen du (2 Unibertsitate Espezializazio eta Berezko Master bat).

Kreditu gutxiagoko prestakuntza programak gehituz ikasleek maila handiagoko titulazioak lor ditzakete, aurrez ezarritako epemugarik gabe.

• Etengabeko Prestakuntzako Masterra: DIGITAL MANAGEMENT & ERP: ENPRESAREN KUDEAKETA 4.0 (60 ECTS kredituak) - 3.300 €
• Unibertsitate Espezializazioa: Enpresaren Kudeaketa Digitala (30 ECTS kredituak) - 1.700 €
• Unibertsitate Espezializazioa: Enpresa-kudeaketarako Sistemak-ERP (30 ECTS kredituak) - 1.700 €

Eskola orduak

• Nahitaezko gaiak: 51 ECTS kreditu
• Ikasketen Amaierako Lana: 9 ECTS kreditu

Ebaluazio prozedurak

• Asistentzia: Eskoletara erregulartasunez joatea (gutxienez % 75), jarrera parte-hartzailea eta proaktiboa izanik, eta ikaskideekin eta irakasleekin errespetuz jokatuz. Bertaratzea erregistratzeko saio guztietan sinadura-orria pasatuko da. "Enpresaren mundura hurbiltzea: praktikak, bisitak eta kanpo-prestakuntza" ikastaroaren kasuan, ikastaroan garatzen diren jardueretara joatea nahitaezkoa da ( % 100) ikastaroa gainditzeko. ( % 15)
• Azterketa moduluka: Ikasgai/modulu bakoitzeko amaierako ebaluazio-probak. Proba horri kalifikazio osoaren eta formatuaren (testa, kasu praktikoen ebazpena, galdera teoriko-praktikoak, etab.) gainean esleitzen zaion ehunekoa desberdina izan daiteke ikasgai/modulu bakoitzean, horietako bakoitzean garatutako irakaskuntza-ezaugarri eta -metodologietara egokituta. ( % 35)
• Bestelakoa: Bi moduluetako bakoitzean (espezialista-ikastaroak) azken lan bat proposatzen da, 4,5 kreditukoa edo 9 kreditukoa master osorako. Ebaluazioa egiteko, masterreko irakasleek osatutako epaimahai batean aurkeztu beharko da, eta ikasleak lortu duen berezko tituluaren gaitasunen garapen-maila baloratuko da, bai eta ahoz eta idatziz komunikatzeko duen gaitasuna ere. ( % 15)
• Lanak: Talde txikietako lan praktikoak, gai/modulu bakoitzean garatutako irakaskuntza-metodologietara eta ezaugarrietara egokituak. Ikasleek, adibidez, aholkularitza-lan txiki bat egin beharko dute (diagnostikoa, ekimenak eta hobekuntza-planak) benetako enpresa batentzat, txosten edo dosier bat egin beharko dute, prozesuak ebaluatu beharko dituzte edo kasu praktiko bat ebatzi beharko dute eskoletan erabilitako informatika-aplikazioak erabiliz. ( % 35)

Ordutegia

Astelehenetik ostegunera, 17:00etatik 21:00arte.

Praktikak

Ekonomia eta Enpresa Fakultateak inguruko enpresekin harreman estua dauka. Praktikak hautazkoak dira, eta prozedura Enpresen Administrazio eta Zuzendaritzako Graduaren kasuan arrakasta handiz egiten denaren parekoa da, non egresatu bakoitzak batez beste bi praktika egiten dituen.

Erakunde kolaboratzaileak

Iberdrola, Laboral Kutxa, Segula Technologies, Benteler, Dachser, Ipargama, Novak Solutions, Minsait by Indra, Alisea

Praktikak eskaini nahi dituzten erakundeak

UPV/EHUko ikasleen kanpoko praktikek hezkuntza akademikoan jaso eta berenganatutako jakintzak aplikatzeko eta osatzeko aukera eskaintzen die ikasleei.

Enpresa edo erakunde gisa interesa baduzue berezko master edo graduondokoren bateko ikasleei praktikak egiteko aukera eskaintzeko:

1. Praktikak eskaintzeko interesgarritzat jotzen duzuen berezko masterra edo graduondokoa identifikatu ezazue. Hemen daukazue prestakuntza eskaintza osoa.
2. Gurekin harremanetan jarri berezkomasteretagraduondokoak@ehu.eus mailaren bidez, hitzarmen bat adosteko