Herri txikiak aurrera begira: Mugikortasun berriaren aukerak eta erronkak

Aldaketa klimatikoaren, trantsizio energetikoaren eta trantsizio ekosozialaren garaian, mugikortasuna da aldaketa sakonean dagoen arloetako bat. Auto elektrikoa, garraio publikoaren birkonfigurazioa, gidaririk gabeko ibilgailuak… asko eta askotarikoak dira pil-pilean dauden aldaketak; hain zuzen, pertsonok alde batetik bestera inoiz baino gehiago mugitzen garen garaiotan. Testuinguru honetan, egokia da galdetzea mugikortasunean gertatzen ari diren aldaketek eta iraultzek nola eragingo duten herri txikietan. Izan ere, landa eremuko auzo eta herri txikietan, baserri inguruetan, normalean jendea sakabanatuta bizi da, eta ibilgailuaren menpeko da eguneroko egiteko ia guztietarako. Aurrera begira jarrita, mugikortasunaren erronkek eta aukerek etorkizuneko herri txiki bizigarrietan izan ditzaketen eraginei buruz hausnarketa egitea garrantzitsua da.

Aurreko urteetako bideari jarraituz, Uda Ikastaro hau herri txikien etorkizunari begira jarriko da, mugikortasunaren ardatza landuz. Ibilgailu elektrikoek, autonomoek, garraio publiko mota berriek edota mugitzeko antolakuntza komunitario berriek hainbat aukera ekar ditzakete. Herri txikietako bizi kalitatea, hein handi batean, lotuta dago bertako biztanleek mugitzeko dituzten aukerekin; eta garrantzitsua izan daiteke aukera horiek ondo aprobetxatzea, bai herrietan bizitzeko baldintzak sortzeko etorkizunean ere, bai komunitatearen garapenerako mugikortasuna diseinatzeko. Horretarako, ikastaro honetan, hainbat diziplinatatik (teknologia, landa garapena, soziologia…) egindako hausnarketak eta Euskal Herriko hainbat lekutako esperientziak uztartuko dira.