Normalización de la Contabilidad Social

Aurten bederatzigarren edizioa egingo duen uda ikastaro honen xedea da erakundeen funtzio sozialari buruzko eztabaida eta diziplinarteko gogoeta sustatzea. Publiko zabalari zuzenduta dago, jasangarritasunari ekarpena egingo dioten erakunde eta enpresa mota berri bat sendotzeko kezkak partekatzen dituena. Aurten, ikastaroa oinarrituko da Kontabilitate Sozialaren normalizazioan.

Gaur egun gizarte osoarentzat berebiziko garrantzia duen gai bati heltzen dio: erakundeek sortutako balio sozialaren kuantifikazioa eta haren normalizazioa.

Une honetan, kontabilitate soziala sendotzeko, haren estandarizaziorantz jo behar da, erakundeen datu indibidualak kanpoko erreferenteren batekin konparatzeko, eta ez da nahikoa kontuan hartzea balio sorkuntzak urteetan zehar duen barne bilakaera.

Ikastaroan aurkeztuko dira normalizaziorako adierazleak, sektoreka gauzatzeko proposatuko direnak, hainbat esparru eta jardueratan, eta genero ikuspegia ere landuko da, generoaren araberako balio banaketaren azterketaren bidez.

Kanpoko erreferenteak zehaztea baliagarria izango da, erakundearen beraren komunikaziorako eta estrategiarako ez ezik, baita beste stakeholder batzuek (administrazioa, bezeroak, finantzatzaileak, langileak...) erakundeari buruzko erabaki informatuak hartu ahal izateko ere.

Adierazleek aktiboki lagunduko liekete erakundeei beren jarduera Garapen Jasangarrirako Helburuetara (GJH) bideratzen, aukera emango bailieke beren ekarpena dirutan kuantifikatzeko eta beren GAP ideal-erreala kudeatzeko. SDG Academy-k UPV/EHUren Kontabilitate Sozialeko MOOC saritu du (Winner 2019), uda ikastaroaren zuzendaritzak eta bertako irakasle batzuek garatutakoa.

Erakundearen errendimendua neurtzeko ikuspegi tradizionala oinarritzen da soil-soilik erakundeak akziodunentzat sortutako balioan. Beraz, funtsezko adierazleak finantzarioak dira. Ikuspegi berri batetik, jasangarritasuna har dezakegu balio kontzeptu zabalagotzat, barne hartzen duena bai stakeholder guztiei banatutako balioa (ez bakarrik akziodunei) bai modu integratu eta sistematiko batean erakundeak interes taldeei zuzenean eragiten dizkien ondorio ez-ekonomikoak. Balio zabalago hori, balio sozial deituko genukeena erakunde batek bere stakeholder guztientzat sortzen duen balio erreala islatzeagatik, lagungarria izan beharko litzateke erakundeentzat beren kudeaketan.

Bost ardatz tematiko nagusi eta zeharkakoren bidez, modu integratu eta zabal batean jorratu nahi dira balio soziala monetizatzeko eta haren normalizaziorako praktika eta teoriari loturiko gai nagusiak:

1. Kontabilitate Sozialaren normalizazioa eta informazio ez-finantzarioa.
2. Balio sozial induzitua sortzea.
3. Balio soziala ez-merkatuko jardueretan.
4. Balio sozial emozionala.
5. Stakeholder Accounting-aren eskalabilitatea.

Ardatz horiek garatuko dira publiko eta sakontze maila askotarikoentzat pentsatutako saioen bidez. Horrela, ikasleen interes, kezka eta ezagutzei erantzungo dien uda ikastaro bat eskaini nahi da. Saioek aukera emango dute aurrera egiteko inplikatutako eragile bakoitzaren eduki espezifikoetan eta interes orokorreko esperientzia inspiratzaileak partekatzeko.

Ikasleen heterogeneotasuna dela eta, Uda Ikastaro hau funtsezkoa izango da inplikatutako agenteek egun dituzten sareak sendotzeko, balio sozialaren sorkuntzari eta kuantifikazioari dagokienez. Ikastaroak erreferentziazko topagune izan nahi du erakundeen balio sozialaren sorkuntzan eta kuantifikazioan benetako interesa duten pertsona guztientzat: enpresaburuak, profesionalak, zuzendariak, aholkulariak, akademikoak, ikertzaileak, ikasleak eta, oro har, herritarrak.