TopaGune: Esperientziaren ahotsak: parte-hartzea, autodeterminazioa eta ahalduntzea gizarteratzeko bidean (II. edizioa)

Gizarte-politika guztietan, oro har, eta gizarteratzeko gizarte-zerbitzuetan, zehazki, arretarako paradigmak eta ereduak birplanteatzeko beharrak gero eta garrantzia handiagoa hartzen ari dira. Gizarte inklusibo batean, herritarrek autodeterminazioa, parte-hartzea edo eskubideen berme handiagoa izatea, ahalik eta bizitza-kalitate handiena lortzeko laguntza egokiak izatea, gizarte zerbitzuen fokuen artean daude.

Gipuzkoako Foru Aldundiko Gizarte Inklusioko eta Indarkeria Matxistaren Biktima diren Emakumeen Arretako Zerbitzuak bultzatu nahi duen arreta-ereduarekin bat etorriz, ikastaro honen helburua da, besteak beste, gizarte-zerbitzuen erabiltzaile diren pertsonen parte-hartzeko eta autodeterminatzeko duten eskubideari buruzko hausnarketa bultzatu eta erraztea. Era berean, garapen pertsonalerako eta gizarteratzeko prozesuen ahalduntzeak duen garrantziaz hausnartzea ere.

Gako horiek abiapuntu, aurten Gizarte Inklusioko eta Indarkeria Matxistaren Biktima diren Emakumeen Arretako Zerbitzuak bi ikastaro berezi, baina harremandu, sustatuko ditu.

Lehenengoa, Uda Ikastaro hau, parte-hartzeari, autodeterminazioari eta ahalduntzeari buruzko ikastaroaren bigarren edizioa da, eta, batez ere, hainbat eremutatik gizarteratze-prozesuren bat pasa duten edo dauden pertsonak izango dira protagonista, iaz egindakoari jarraipena emanez.

Ikastaro horrez gain, hurrengo egunean beste Uda Ikastaro bat egingo da, batez ere gizarte-zerbitzuen eremuan esku-hartze sozialean lan egiten duten profesionalentzat (gizarte-bazterkeria edo -arriskuan dauden pertsonekin, indarkeria matxistaren biktima diren emakumeekin, desgaitasunen bat dutenekin edo osasun mentaleko arazoak dituztenekin...). Ikastaro hau gizarte-politiken plangintzan eta kudeaketan lan egiten duten profesionalentzat ere zuzenduta dago. Gizarteratzeko eta esku-hartze sozialeko prozesuetan pertsonen autodeterminazioa, parte-hartzea edo ahalduntzea sustatzeko eredu, ikuspegi edo metodologietako batzuk jorratuko dira, zerbitzuetan pertsonengan baino gehiago zentratutako ereduak birplanteatzeko beharraren esparruan.

Uztailaren 18an, 18:45ak aldera (gutxi gorabehera), Miramar Jauregian bertan, Las Poderosas taldearen Performance bat eskainiko da doan, 35 minutu inguru iraungo duena.

Uztailaren 17ko 'Esperientziaren ahotsak: parte-hartzea, autodeterminazioa eta ahalduntzea gizarteratzeko bidean' Uda Ikastaroan izena eman duten pertsonak eta uztailaren 18ko 'Inklusiorako trantsizioa: parte-hartzea, autodeterminazioa eta ahalduntzea sustatzeko eredu eta ikuspegiak' ikastaroan izena eman duten pertsonak gonbidatuta daude ekitaldi honetara, doan.