Berri guztiak

Osasun Digitalari buruzko Nazioarteko IX. Kongresuak eduki eta partehartze arrakastatsua izan du

Guztira 250 pertsona izan ziren Signo Fundazioak, Osasun Digitalaren Elkarteak eta UIK-k antolatutako bederatzigarren edizioan. Irailaren 12tik 16ra ospatu zen, formatu hibridoan, Madril, Bartzelona eta Donostiatik zuzeneko emanaldiekin eta zenbait jardunalditara bertaratzeko aukerarekin ere.

Signo Fundazioa eta ASD dira Kongresua antolatzen duten erakundeak eta zuzendari lanetan Marisa Merino egon da, Osakidetzako Tolosaldea Erakunde Sanitario Integratuko zuzendari gerentea eta Signo Fundazioko presidenteordea dena. Kongresuaren bederatzigarren edizio hau, ohi bezala, UIKren barruan egin da.


Balio akademiko handiko urteko ekitaldi zientifikoa da hau, osasun-sektorean nazioarteko erreferente bihurtu dena. Hitzordura osasun eta herritarren arretaren hainbat arlotan lan egiten duten 70 profesional bertaratu ziren. Horiek guztiek ekarpen garrantzitsuak egin zituzten teknologia digitalen erabileran aurrera egiteko, asistentzia-kalitatea, pazientearen esperientzia eta osasun-sistemaren iraunkortasuna hobetzeko, osasunaren sektorearen eraldaketa digitalerako gai berritzaileen bidez, 11 mahaitan banatuta, eta azken eztabaida handi batean, edizio honetako leloari erantzun zitzaion: "Nola gauzatu Balioan Oinarritutako Osasun Digitala".


Osasun Digitalaren II. Astearen esparruan inauguratu zen, irekiera-ekitaldi batean, Jaime del Barrio ASDko presidentea buru zela. Irekiera-hitzaldia María Isabel Moyak egin zuen, Medikuen Elkargo Ofizialen Kontseilu Nagusiko (CGCOM) 1go lehendakariordeak, "Eraldaketa digitala Arreta Medikuan" izenburuarekin. Bertan, osasunaren sektorearen eraldaketa digitalean aurrera egiteko beharrezkoak diren eskakizun eta balioez hitz egin zuen. Jarraian, bi mahai egin ziren "Osasun-profesionalek osasun digitala behar dute" gaiaren inguruan. Osasun digitaleko ekosistemaren aliantza estrategikoak, enpresaren eta industriaren ordezkariek ideiak, esperientziak eta proiektu berritzaileak partekatu zituzten osasun-arretan balioa emateko tresna digitalen erabileran, biriketako minbizian, farmakozaintzan eta abarretan.

Bigarren eta hirugarren jardunaldietan, osasun-arretan teknologia digitalak erabiltzeko proiektuak eta esperientziak partekatzeari eta horiek asistentzia-prozesuan sartzeari ekin zioten, bai eta osasun-sektorearen eraldaketa digitalaren orainari eta etorkizunari buruzko eztabaida eta hausnarketari ere. Arlo klinikoko eta kudeaketako ordezkariek beren osasun-erakundeetan teknologia digitalen erabilerari, haien eraginari eta eman dezaketen balioari buruz egiten ari diren esperientziak azaldu zituzten.

Biltzarraren laugarren egunean, hainbat mahai ezberdin osatu ziren. Mahai horietan, osasun-ekosistemaren hainbat arlotako ordezkariek parte hartu zuten (klinika, kudeaketa, enpresa, industria), eta ekarpen interesgarriak eta beharrezkoak egin ziren sektorearen eraldaketa digitalean aurrera egiteko, osasun-arretaren balioa bermatuko duen asistentzia-prozesuan teknologia digitalak sartuz. Hori guztia Balioan Oinarritutako Osasun Digitalarekin lortzen da. Pazienteen ikuspegitik, osasun digitala "pazientearen esperientzia" izeneko mahaian azaldu zen. Bertan, Andoni Lorenzok (Gaixoen Espainiako Foroko presidenteak, FEP) adierazi zuen badirela ondo etorriko zaizkigun irtenbide handiak, baina teknologia erabiltzerakoan arazoak dituzten biztanle-multzo jakin bat baztertzeko arriskua dagoela. Bestalde, Salvador Verak (Mysphera-ko CEO-a) aitortu zuen soluzio digitalen garapenean, erabilgarritasun-diseinutik abiatuta, ez direla pazienteak gehiegi kontuan hartzen, eta hori aldatu egin beharko litzatekeela, eta "best practice" gisa hartu. Mahai horretan, hizlariek gogoeta egin zuten pazienteak berrikuntzan txertatzeko moduari buruz, eta paziente-elkarteen parte-hartzea, prozesuetan txertatzea eta pazientearengan oinarritutako diseinua proposatu zuten.

Kongresuaren azken egunean, Euskal Herriko hainbat proiektu aurkeztu ziren Health 2.0 Basque-k antolatutako mahaian, fundatzaileetako bik moderatuta: Juan Carlos Santamaría (Init Taldeko Inithealth-eko komunikazio zuzendaria) eta Gonzalo López (Sopra Steriako iparraldeko negozioaren garapen zuzendaria). Osasun-erakunde batzuk gaur egun erabiltzen ari diren eta emaitza onak lortzen ari diren tresna eta irtenbide digital interesgarriak ezagutarazi zituzten: errealitate birtualaren erabilera minbiziaren aurka, errealitate birtualeko betaurrekoetan ikusitako izaera distraktore eta terapeutikoko eduki murgiltzaileekin; adimen artifizialaren erabilera prebentziorako, jarraipenerako eta laguntza pertsonalizaturako haurdunaldian zehar; edo adierazle mediko baten sorrerari aplikatutako konputazio kuantikoa, besteak beste.

Osasun Digitalari buruzko Nazioarteko IX. Biltzarra amaitzeko, Eusko Jaurlaritzako Osasuneko sailburuorde den José Luis Quintas izan genuen gurean.