X Congreso anual Geaccounting. Contabilidad social para la sostenibilidad

Hamargarren edizioa egitera doan ikastaro honen helburua da diziplina arteko eztabaida eta gogoeta sustatzea erakundeen gizarte funtzioaren inguruan. Publiko zabalari begira antolatzen da, erakunde mota berri baten eraikuntzan interesatuta dagoena, ikuspegi humanista batetik gizarte onura sortzen lagunduko duen erakundea. Aurtengo ikastaroaren ardatza izango da kontabilitate soziala, haren funtzioa erakundeetan jasangarritasuna bultzatzeko elementu gisa.

Ikastaroak aztergai izango du gaur egun gizartearentzat berebiziko garrantzia duen gai bat: jasangarritasuna. Beharrezkoa da gobernuen, sektore pribatuaren, gizarte zibilaren eta herritarren arteko lankidetza ondorengo belaunaldiei planeta hobeago bat utziko diegula ziurtatzeko.

Hori horrela, kontabilitate sozialak erakundeen jasangarritasunari egiten dion ekarpenari erreparatuko diogu, eta haren aplikazioari lotutako esperientzia berritzaileak ezagutuko ditugu.

Erakunde baten errendimendua neurtzeko ikuspegi tradizionala oinarritzen da soil-soilik erakundeak akziodunentzat sortutako balioan, eta, beraz, adierazle nagusiak finantzarioak dira. Ikuspegi berri batetik, jasangarritasunetik hain zuzen, balioaren kontzeptu zabalago bat har dezakegu, stakeholder guztien balio banatua barne hartzen duena, ez bakarrik akziodunena. Halaber, kontuan hartzen ditu ere, modu integratu eta sistematiko batean, erakundeak bere interes taldeentzat dituen efektu ez zuzenki ekonomikoak. Balio zabalago horri gizarte balioa dei diezaiokegu, erakunde jakin batek gizarte osoarentzat sortzen duen balio erreala islatzeagatik, eta lagungarri izango da jasangarritasuna lortzeko erakundeetan.

Bost ardatz tematiko nagusi eta zeharkakoren bidez, modu integratu eta zabal batean landu nahi dira kontabilitate sozialaren praktika eta teoriari lotutako gai nagusiak eta jasangarritasunari egiten dion ekarpena:

• Enpresa eredu berriak
• Gizarte Balioa sortzea eta GJHak
• Kontabilitate Sozialaren aplikazio sektoriala
• Gizarte balioa eta erosketa publikoa
• Balio emozionala kontabilizatzea

Ardatzak landuko dira saio bat baino gehiagotan, hainbat publiko eta sakontze mailatarako pentsatuak. Horrela, ikastaro egoki bat eskaini nahi da, ikasleen interesei, kezkei eta ezagutzei erantzungo diena. Saioen bitartez, sakondu egingo da inplikatutako agente bakoitzaren eduki espezifikoetan, eta interes orokorreko esperientzia inspiratzaileak partekatuko dira.

Ikasleen heterogeneotasuna dela eta, ikastaro hau funtsezkoa izan daiteke inplikatuta dauden agenteen inguruko sareak indartzeko, gizarte balioaren sorkuntzan eta kuantifikazioan eragiten dutenak. Ikastaroa sortu da erreferentziazko topaketa bihurtzeko helburuaz, erakundeek sortutako gizarte balioaren sorkuntzan eta haren kuantifikazioan benetako interesa duten pertsona guztiak biltzeko: enpresaburuak, profesionalak, zuzendariak, aholkulariak, akademikoak, ikertzaileak, ikasleak eta publiko orokorra.