Bikaintasuna Euskal Ikasketetan XVI. Euskara oholtzetan: musika, hizkuntza, nazioartea

Monika Madinabeitia irakasle titularra da Mondragon Unibertsitateko Humanitate eta Hezkuntza Fakultatean, Espainian. Bere ikerketa arlo nagusiak e/immigrazioa dira, Amerikako mendebaldeko euskal diaspora nabarmenduz.

Jurgi Ekiza Euskal Herriko iparraldean bizi den musikari eta sortzailea da. Bere ibilbidea rock eta musika alternatiboaren inguruan garatu du. Batez ere Willis Drummond taldearekin ezaguna egin bada ere, bere bakarkako proiektuan (Ekiza) ahots propio eta intimoago bat landu du. Haurtzaroan euskara izan zuen lehen hizkuntza, baina denborarekin galdu egin zuen. Euskal musikak euskaldun sentitzera eraman zuen, eta 17 urterekin euskara berriz ikasteko hautua egin zuen, bere identitatearekin eta sormenarekin estuki lotuz. Jurgi Ekizaren proiektu eta lan guztiek (Ekiza, Willis Drummond, Erabatera, Zura, Bbax, etab.) badute ezaugarri komun bat: euskara hautu kontziente eta sortzaile gisa erabiltzea. Ipar Euskal Herrian bizi arren, non euskararen presentzia ahulagoa den, bere proiektu musikal guztiak euskaraz sortzen ditu, hizkuntzari leku zentral eta bizia emanez. Haren kantuek barne mundua, kontraesanak eta gizartearekiko begirada kritikoa uztartzen dituzte, hizkuntza bera tresna artistiko eta politiko bihurtuz. Willis Drummond taldeak 2024an etenaldi mugagabea iragarri zuenetik, artistak bere bakarkako proiektuari lehentasuna eman dio, eta garai honetan ARGITZALA (2025) bere azken diskoa aurkezten ari da.

Amaia Ispizuak 20 urte baino gehiago daramatza zuzeneko musikaren sektorean lanean. Syntorama edo Jazzaldia bezalako enpresetan lan egin du, eta, gaur egun, 10 urte baino gehiago daramatza Get In-en ekitaldiak sustatzen. Musika-ekitaldiak bere ibilbide osoan antolatzen ditu: ticketinga, promozioa eta marketina, Business Plana, logistika, etab. Get In lanarekin batera, Musika Bulegoko eta Musika Industriaren Elkarteko (MIE) zuzendaritza-batzordeko kidea da, baita MIMeko (Mujeres en la Industria de la Música) bazkidea ere.

Komunikazio Zientzietan lizentziatua Nafarroako Unibertsitatean eta kulturaren eremuan ibilbide luzea egina, Irene Larraza Aizpuruak (Tolosa, 1970) erantzukizuneko lanpostuak bete izan ditu komunikazioaren eta kultur kudeaketaren eremuetan. Hasiera batean, Herri Irratian esatari eta erredaktore lanetan aritu zen hiru urtez. Ondoren, Donostiako Koldo Mitxelena Kulturuneko Sustapenaren eta Hedapenaren arduradun izan zen hiru urtez, eta zortzi urtez izan zen Syntorama musikarien ordezkaritza-agentziako Sustapenaren, Komunikazioaren eta Editorialaren arduradun. 2008 eta 2012 urte bitartean Tolosako Udalean garatu zuen bere ibilbide profesionala Kulturako Koordinatzaile eta Zuzendari gisa. 2012az geroztik, Etxepare Euskal Institutuaren taldeko kide da Larraza. Bertan, Komunikazio Arduraduna izan zen aurrena, eta 2016ko azaroaz geroztik Kulturaren Sustapen eta Hedapen Zuzendaria hurrena. 2018tik da Etxepare Euskal Institutuko zuzendaria.

Monika Madinabeitia irakasle titularra da Mondragon Unibertsitateko Humanitate eta Hezkuntza Fakultatean, Espainian. Bere ikerketa arlo nagusiak e/immigrazioa dira, Amerikako mendebaldeko euskal diaspora nabarmenduz.

Jon Maia Soria (Urretxu, 1972). Zumaiara joan zen bizitzera sei urte zituela. Euskal Filologian graduatua da. Bertsolari gisa 1997, 2001, 2005 eta 2009ko Txapelketa Nagusiko finalista izan zen. Baita Gipuzkoakoan ere 2003, 2007 eta 2015 urteetan. Bertsolari izateaz gain, kolaboratzaile moduan aritu da hainbat hedabideetan. Karidadeko Benta musika taldeko sortzaile eta abeslaria izan da. Berriki Hezur beltzak taldea sortu eta bertan aritzen da kantari gisa. Idazle lanetan ere aritzen da: kantuak, gidoiak eta liburuak esaterako; Riomundo (Txalaparta, 2005) eta Berriak jaio ginen (Lanku, 2017). Azken horretan oinarrituta emango du UIK-eko hitzaldia.

Arkaitz Villar esatari lanetan aritu da Gaztea irratian eta EITB.eus-en postu ezberdinetan (Euskal Irrati Telebista Publikoa). Musikan espezializatutako hainbat komunikabidetan kolaboratzailea izan da: Entzun, Zarata – MondoSonoro, Euskadi Irratia, Radio Euskadi, Berria eta 2016tik Kultura Live (Euskal Herriko kontzertu aretoen elkartea) elkartearen koordinatzailea da. 2019an etapa berri bati ekin zion Musika Bulegoko proiektuen arduradun eta Euskal Herriko musika nazioartekotzeko Basque. Music plataformaren koordinatzaile gisa. Panelista gisa parte hartu du BIME Bilbao, Fira Trovam, BIME Bogota eta antzeko nazioarteko azoketan. Gaur egun musikaren nazioartekotzean espezializatuta dago eta aktiboki parte hartzen du EMEE edo Live DMA bezalako nazioarteko sareetan.