Migratze-prozesuen etorkizuna Europan, Baionan aztergai
Eskubideetan eta mugaz gaindiko dimentsioan oinarritutako ikastaroa hartu zuten Mugaz Gaindiko Uda Ikastaroek, non Chloé Fauchon eta Sonia García hizlari izan ziren, beste aditu batzuekin batera.
2025eko uztailaren 1ean, Baionako Cité des Arts egoitzan egin zen “Migrazioari eta asiloari buruzko Europako itun berria: mugaz gaindiko dimentsioa eta eskubideak” izeneko ikastaroa, Mugaz gaindiko Uda Ikastaroen laugarren edizioko programaren baitan. Ikastaroak arlo juridiko, instituzional eta akademikoko adituak bildu zituen, Europar Batasunak onartu berri duen Itun Berriaren azterketa egiteko, eskubideetan eta mugen (fisiko nahiz digital) dimentsioan duen eragina ardatz hartuta.
Jardunaldia hiru paneletan eta elkarteen parte-hartzearekin eginiko mahai-inguru batean egituratu zen. Bigarren panelean, “Ituna eta muga fisikoak eta digitalak” izenekoan, Chloé Fauchon irakasleak parte hartu zuen (Pauen eta Aturrialdeko Unibertsitatea – CDRE-UPPA), eta nabarmendu zuenez: “Ikastaroaren helburua mugaz gaindiko unibertsitate arteko lankidetza sendotzea da. Nire ekarpenean mugak digitalizatzeaz jardun dut, eta zehazki, Eurodac fitxategiaren erreformaz, Itun Berriaren baitan txertatzen dena”.
Bestalde, hirugarren panelean, oinarrizko balioetan oinarritutakoan, Sonia García irakasleak (A Coruñako Unibertsitatea) honako hau aztertu zuen: “Nire ekarpena Europako Batasunak mugak kanpora eramateko egiten duen politikaren ingurukoa da, bai eta Itunean aurreikusitako elkartasun ereduaz ere: nahiz eta nahitaezkoa ez izan, ‘elkartasun malgu’ edo ‘aukerazko’ bat planteatzen da, Polonia edo Hungaria bezalako estatuen jarrera zurrunak integratzen saiatzeko”.
Ikastaroak Europar Batasuneko migrazio-, asilo- eta muga-politiken etorkizunean eragin handia izango duen arau-testuaren inguruko gogoeta kritikorako eta eztabaida akademikorako espazio egokia eskaini zuen. Baionan egindako topaketak agerian utzi zuen mugaz gaindiko erronkei elkarlanean heltzeko asmoa, lurraldeen arteko lankidetza juridiko, humanista eta europar baten alde.
