TopaGune Ikastaroa: Gazteen emantzipazioa hiru zutabe hauetatik abiatuta: etxebizitza, formakuntza eta lana

UPV/EHUko Uda Ikastaroetan aurkezten den jardunaldi honek ia bi urtez eta lau erakunderen bitartez lankidetzan garatu den ekinbat! proiektuari eman nahi dio amaiera. Gipuzkoan bizi diren eta desabantailan dauden gazteen gizarteratzea eta enplegagarritasuna erraztea du helburu proiektuak, eta horretarako, gizartean, komunitatean eta kulturan parte-hartzea sustatzen dituzten testuinguruak sortzeko lanetan aritu dira zenbait entitate 2024 eta 2025 urteetan.

Ikastaro honetan, prozesuan zehar ateratako ondorio eta ikasketak gizarteratu nahi dira, eta desabantaila egoeran dauden gazteekin lan egiten duten profesionalekin batera gaia jorratu. Horretarako, ezagutza, esperientzia eta ikuspuntuak elkarbanatu nahi dira batetik; bestetik, estrategia berriak pentsatu eta diseinatu nahi dira arlo ezberdinetako profesionalen elkarlanaren bitartez; eta azkenik, gazteen emantzipazio prozesuak errazteko sortu den gida partekatuko da gerturatzen diren profesionalen artean.

Jardunaldi honetan, eta betiere gazteen emantzipazioari lotuta, etxebizitzaren, formakuntzaren eta lanaren ardatzak landuko dira. Horrez gain, estrategikoak diren hainbat elementu plazaratuko dira, hala nola parte-hartze espazioak, komunitateak, kultura eta artea.

Hiru ardatz nagusiak - etxebizitza, formakuntza eta lana - atal ezberdinetan banatu dira, eta horietako bakoitza jorratzeko esperientzia ezberdinak jaso nahi dira: maila instituzionaletik batetik, eta kolektibo zaurgarriekin egunerokoan lan egiten duten profesionalen esperientziatik, bestetik. Hitzaldi bakoitzean tartea izango da publikoaren zalantzak edota ikuspuntuak jasotzeko. Ardatz nagusi horiek landu ostean, emantzipazioaz ari garela, berebiziko garrantzia duten beste zenbait aspektutaz hitz egingo da: parte-hartzeaz, ahalduntzeaz eta komunitateaz.

Hitzaldien bidez, esperientzia, hausnarketa eta datuak entzun ostean, entzuleek parte hartzeko dinamika egingo da, gazteen emantzipazio prozesuetan bidelagun izateko elementuak zeintzuk izan beharko lirateken elkarrekin eztabaidatzeko eta estrategia kolektiboak diseinatzen hasteko.

Parte-hartzaile guztiek ekinbat! proiektuan garatu den emantzipaziorako gida eskuratu ahal izango dute, haien ibilbide profesionalean lagungarri izan dakiekelakoan.

Ikastaro hau TopaGune motatakoa izango da. Izen hau, partaidetza maila altuena eragiten duten ikastaroei ematen zaie. Kasu hauetan ikastaroen zuzendariak, UIKko zuzendaritza akademikoak eta ikastaroan erraztatzaile lanak egingo dituen pertsonak elkarrekin diseinatzen dituzte eraginkorrenak izango diren teknikak ikastaroa parte hartzailea izateko. Horrela, ikastaroan parte hartuko duten pertsonek Uda Ikastaro honetan proposatuko diren hausnarketa eta ko-sorkuntza dinamiketan parte hartze aktiboa izango dute.