EHUren Uda Ikastaroen 45. edizioak partekatutako ezagutza aldarrikatu du demokraziaren etorkizunaren berme gisa
Imanol Pradales lehendakariak inauguratu du EHUren Uda Ikastaroen 45. edizioa Donostiako Miramar Jauregian. Ekitaldian, Daniel Innerarityk Demokraziaren etorkizuna | El futuro de la democracia hasiera-hitzaldia eskaini du.
150 lagun baino gehiago bildu dira gaur arratsaldean Euskal Herriko Unibertsitatearen (EHU) Uda Ikastaroen 45. edizioaren inaugurazio-ekitaldian, Donostiako Miramar Jauregian, Uda Ikastaroen egoitza nagusian. Imanol Pradales lehendakariak inauguratu du ofizialki edizio berria, eta Daniel Innerarityk Demokraziaren etorkizuna | El futuro de la democracia hasiera-hitzaldia eskaini du.
Ekitaldi honekin, Uda Ikastaroek ofizialki abiatu dute dagoeneko martxan den 45. edizioa. Irailaren amaierara arte, 133 Uda Ikastaro eta 29 workshop egingo dira hainbat egoitzatan, milaka lagun bilduz ezagutzaren inguruan. «Pentsatzen duzulako gara» lelopean, aurtengo programak gure garaiko erronka nagusien inguruko hausnarketa kolektiboa proposatzen du; besteak beste, demokraziari, zaintzei, osasunari, adimen artifizialari, jasangarritasunari, berrikuntzari, kulturari eta gizarte-kohesioari buruzkoa.
Lehendakariarekin batera, ekitaldian parte hartu dute Joxerramon Bengoetxea, EHUko Uda Ikastaroen Fundazioko presidente eta EHUko errektoreak; Laura Poderoso, BBVA Fundazioko zuzendariordeak; Irune Berasaluze, Gipuzkoako Foru Aldundiko Gobernantzako diputatuak; Jon Insausti, Donostiako alkateak; eta Idoia Otaegui, EHUko Uda Ikastaroetako zuzendari akademikoak.
Bere hitzaldian, Imanol Pradales lehendakariak nabarmendu du nazioarteko egoera gero eta ziurgabeagoa eta ezegonkorragoa dela, eta horrek sistema demokratikoak gero eta presio handiagoaren pean jartzen dituela. Egoera horren aurrean, zientziaren eta ezagutza aurreratuaren aldeko apustua berretsi du, lehiakortasuna, gizarte-kohesioa eta bizi-kalitatea hobetzeko ez ezik, bizikidetza eta kultura demokratikoa sendotzeko ere funtsezkoak direlako. Ildo horretan, ikerketa, hezkuntza eta ezagutza indartzearen alde egin du, gaur egungo zein etorkizuneko erronkei erantzuteko ezinbesteko tresnak direlako.
Ekitaldiko une nagusietako bat Daniel Innerarityk eskainitako Demokraziaren etorkizuna | El futuro de la democracia hasiera-hitzaldia izan da. Filosofia Politikoko katedradun, EHUko Ikerbasque ikertzaile eta Gobernantza Demokratikoaren Institutuko zuzendariak adierazi du demokraziaren etorkizuna ez dagoela aurrez idatzita; aitzitik, gizarteek etengabe aldatzen ari den mundura egokitzeko izango duten gaitasunaren araberakoa izango dela. Azaldu duenez, demokraziak etorkizuna izango badu, bere burua berritzeko eta gaur egungo erronka politiko, sozial eta teknologikoei arrakastaz erantzuteko gai izan beharko du.
EHUko Uda Ikastaroetako zuzendari akademiko Idoia Otaeguik nabarmendu du Uda Ikastaroak gizarte osoari irekitako ezagutza-, hausnarketa- eta ikaskuntza-ekosistema direla, non banakako pentsamendua ezagutza kolektibo bihurtzen den. Azaldu duenez, «Pentsatzen duzulako gara» leloak 45. edizio honen funtsa laburbiltzen du: polarizazioak eta informazioaren kontsumo azkarrak markatutako garai honetan, elkarri entzutea, elkarrizketan aritzea eta elkarrekin pentsatzea.
Era berean, azpimarratu du aurtengo programak ikuspegi integratzailea eskaintzen duela, pertsonak eta haien bizi-baldintzak erdigunean jarriz. Hurrengo hilabeteetan zehar, Uda Ikastaroetan zaintzak, osasuna, eraldaketa teknologikoa, adimen artifiziala, demokrazia, gobernantza, kultura, hezkuntza, jasangarritasuna eta gizarte-kohesioa izango dira hizpide, norbanako gisa nahiz gizarte gisa aurrera egiten lagunduko duten hausnarketak eta eztabaidak sustatzeko asmoz.
Ildo beretik, Gipuzkoako Foru Aldundiko Gobernantzako diputatu Irune Berasaluzek adierazi du ezagutza partekatzeak, elkarri entzuteak eta hitza emateak demokrazia indartzen dutela. Azpimarratu du Uda Ikastaroek Gipuzkoa eta Euskadi irekiago, berdinzaleago eta demokratikoago bat eraikitzen laguntzen dutela, errealitate berriak ulertzeko gaitasuna sustatuz eta, aldi berean, bizikidetzaren oinarrian dauden balioei eutsiz.
Donostiako alkate Jon Insaustik, berriz, geldialdirako eta hausnarketarako guneak zaintzearen beharra aldarrikatu du, bizkortasunak eta informazio-gehiegikeriak markatutako gizarte batean. Nabarmendu du berehalakotasunaren eta polarizazioaren aurrean Uda Ikastaroek ezinbesteko espazioa eskaintzen dutela eztabaida pausaturako, zorroztasun zientifikorako eta pentsamendu partekaturako. Halaber, etorkizuneko erronkei aurre egiteko ezagutza, ziurtasunak eta zorroztasun zientifikoa ezinbestekoak direla azpimarratu du, eta Uda Ikastaroei eskerrak eman dizkie herritarrak gizartearen erronka handien inguruko hausnarketan inplikatzen laguntzeagatik.
Bestalde, BBVA Fundazioko zuzendariorde Laura Poderosok nabarmendu du erakundeak 37 urte daramatzala Uda Ikastaroekin lankidetzan, eta azpimarratu du ekimen hau elkarrizketarako, hausnarketarako eta ideien trukerako erreferente bihurtu dela. Era berean, Fundazioak ezagutza gizarteratzen, pentsamendu kritikoa sustatzen eta aurrerapen zientifiko, teknologiko eta humanistikoa bultzatzen duten proiektuekin duen konpromisoa berretsi du.
Azkenik, EHUko Uda Ikastaroen Fundazioko presidente eta EHUko errektore Joxerramon Bengoetxeak adierazi du Uda Ikastaroak gizarteak dituen erronkei erantzun kolektiboa emateko ideiak eztabaidatu eta kontrastatzeko gunea direla. «Pentsatzen duzulako gara» leloari erreferentzia eginez, banakako hausnarketatik elkarlanera igarotzearen beharra aldarrikatu du, Europako ongizate komunaren ikuspegia berreskuratuz eta gizarte-elkartasuna sendotuz. Horren harira, adierazi duenez, «demokrazian sinesten jarraitzeak etorkizuna duela sinestea esan nahi du, eta etorkizun hori guztion artean hartuko ditugun erabakien araberakoa izango da».
